1 – O ry Mpitondra foy be Ray aman-dReny hajaina ô, dia milamina sy azo tory tsara ve ianareo mahita ity fifamonoana samy Malagasy ity. Sitrany ve hoy ianao ny maha dahalo azy ? Tena safidiny ve ? Ary tena safidin’ny  vahoaka  ve ny hamono, handoro ireo malaso, zaza, tanora, eny fa na olon-dehibe aza ? Asa re, na hatraiza ny feon’ny fieretreretanareo, indrindra ho anao ry Filoha hajaina ANDRY, vidio re ny anaranao, ho andry iankinan’ny vahoaka, ary asehoy ny hambo-po-pirenena izay tiana tokoa ny miventso an’izany. Aiza ianao ry Fikambanana « FITIA », andefomandrin’ny Filoha ianao, fon-dreny, hetseho re ny fon’ny dada raha sepotra, fa mifamono ny vahoaka malagasy, tsy ampy « Fitia » matoa tody amin’izany. Ilaina tokoa ny tafika amin’ny fandriam-pahalemana, fa tsara lavitra noho izany ny fahasahiana hisambotra ireo dahalo ambony latabatra. Koa raha tsy ianao Filoha no ambadik’izao, dia ampisambory ireo dahalo ireo, fa na zazakely efa vory saina afaka mahatakatra hoe : nahoana ny dahalo no manana fitaovana mahery vaika toy ireny, dia hiteny ve ianao fa tsy fantatro ? Raha tsy fantatrao tokoa ary, dia maneho aminay vahoaka izany fa mbola tsy manana traikefa ianao ,ary hita fa efa tsy maha voafehy intsony ny Firenena, ka ny mametra-pialana no fahendrena mety. Ho sahinao ve ny hametra-pialana? Nofy izany ? Andraso eo ary fa ho tonga aminao ny hafatra. Mba efa tany antsimo ve ianao amin’izao toe-javatra izao ?

2 – O ry Andriamatoa Ravalo sy Lalao ô, aza mba mety hatao fahavalo tokoa ianao Ravalo, ary aza lalaovina ny fianam-pirenena ry Lalao, ka sao ianareo ihany koa no ao ambadik’izao, mba hilazana fa tsy mahavita ny tetezamita, ka dia ho tafaverina moramora eo ianareo. Nefa raha izany no ao an-tsaina, dia tsy hahasoa anao izany. Raha tsy ianareo ary, dia asehoy anay vahoaka ny mporofo fa tsy ianareo, vakio batsilana izay rangory fototry ny afo amin’izao toe-javatra tsy mendrika ny maha olona izao. Asehoy fa olo mbola tia Tanindrazanao ianao Filoha, ka ho tsarainay vahoaka hoe iza marina no tena mendrika ho filohan’ny Malagasy ?

3 – Ho anareo mpitondra Fanjankana aty antsimo, mba tsy hilazana nyû faritra hafa ; mahasahia mijoro hanao fitakiana any amin’ny Fanjakana foibe (raha tsy efa voavidy koa ianareo), ka hisambotra ireo dahalo ambony latabatra. Satria ve hoy ianao tsy misy porofo hahafahana misambotra izany, ary iza no ho samborina ? Porofo inona koa no mihoatra ireo fitaovana hita fa mahery vaika ampiasan’ireo dahalo ireo ?AVY AIZA IREO, LATSAKA AVY ANY AN-DANITRA VE ? ARY MANKAIZA IREO OMBY ? Mazava fa tsy afa-miala amin’izany ny Filoha (na izy ao anatiny, na izy tsy mahasahy fa tia ny fahefany), ny ministra momba ny varotra sy ny tafita, mba tsy hilazana ny sasany. Entano hikomy ny vahoaka, hikomy tsy misy herisetra, fa fanehoan-kevitra an-kalalahana, am-pilaminana, am-pahendrena sy fitiavana. Ary sao ary mba misy harena hafa ny ao antsimo ao, ka tianareo hisesi-tany ny vahoaka ???

4 – Manainga ny vahoaka Malagasy rehetra. Andao hiombona, hihetsika, satria  nahoana no tsy taitra ny mpitondra Fanjakana foibe, sa mody taitra ve, satria hanome vola be izay mahasambotra,na mahafaty an’i Remenabila ? Hay misy vola ny ao, ampiasao io vola io hitadiavana ny soa ho an’ny vahoaka, fa aza mody atao safosafo mampandry andrisa eo ny vahoaka ; sao ianareo ihany ilay Remenabila, andao fa tsy ho ela dia ho tody aminareo ny hoe izay mahavoasambotra na mahafaty an’i Remanbila dia ho mena vola ? Ny handosiranareo any ivelany toy ny ataon’ny sasany reny no hiafaranareo koa raha mbola tsy taitra ihany ianareo. Eny eh, efa taitra tokoa ianareo Fanjakana boibe satria mandefa tafika hamono ireo daholo izay voatery dahalo satria noana, voavidy vola, tsy nisy nanabe sy nananatra. Mijoroa isika vahoaka, ny misambotra ny dahalo ambony latabatra no vahaolana maharitra tsara indrindra.

5 – Ry tafika Malagasy ô, indrindra ho anareo atao sorona dia manaiky satria izany no baiko’ny lehibe, misaotra amin’izay efa vitanareo, ary miara-ory amin’ny rahalahy maty noho ny fanom-poam-pirenena. Fa izao aza mety atao fitaovana hamono ny gasy toa anao ianao, fa mivondrona ianareo, sambory ny tena daholo, dia ireo mana-bekibo ambony latabatra, ireny tena dahalo. Rehefa tena hamongotra ny ratsy dia ny fotony no fongory.

6 – Manainga ny mpitondra fivavahana rehetra, manaova vavaka firaisam-pinona re raha sitrakareo, ary asehoy amin’ny fomba miavaka izany vavaka hatao izany ; satria mahery Andriamanitra, ary mahay manova ny fo vato ho fo nofo. Soso-kevitra fa ianareo mpitondra fivavahana mahita ny fomba sy ny fotoana hanantaterahana an’izany. Ataovy haingana re raha sitrakareo, fa mahaloaka lanitra ny vavaka, ka hirotsaka amintsika rehetra ny Fanahy Masina.

Dia ho taraina any an’efitra ve izany rehetra izany, ka tsy misy mpihaino ?

Mba henoy fa mitaraina  ny Ran’ny malagasy,

ary tsy zakanao ry dahalo ambony latabatra ny vokany.

Zanahary ô, tahio ny Tanindrazanay…….

Frydolin Anjarason