Mitohy ny tantara. Niha nirehitra ny raharaha mahakasika ny fanavaozana ny lapa maitso manoloana ny biraon’ny kaominina Toamasina. Taorian’ny famoriam-bahoaka nataon-dRoland Ratsiraka sy Botozaza Pierrot ny alakamisy lasa teo, izay nanaovan’izy ireo antso avo amin’ny tsy tokony ikitihana ireo ahi-matso sy palmier manoloana io lapa io, tsy niandry ela ny valin-kafatra avy tamin’ny CST Naharimamy Lucien Irmah izay sady sekretera nasionalin’ny antoko Tgv. Ny sabotsy maraina lasa teo, nanao be midina teo anoloan’ny lapan’ny tanàna ity CST ity sy ireo mpiara-dia aminy izay nahitana an’i Naivo Michel , mpanolotsaina manokan’ny PDS Toamasina ary ny CT Ndalana Hasina Espérant.

Namatapatatra izy ireo fa “fisakanana ny fandrosoan’i Toamasina io fihetsika ataon’ireo mpanao politika sasantsasany eto Toamasina ireo izay misakana ny fanatsarana ny tanànan’i Toamasina. Olona efa nitondra an’i Toamasina ireo olona ireo nefa tsy nisy zavatra vitan’izy ireo teto. Fampanantenana nataon’ny Filoha Rajoelina io fanatsarana ny lapan’ny tanàna io, ka tokony hotohizana hatramin’ny farany. Mahagaga fa isika anateran-kira indray no milaza tsy mahay hihira. Isika mpanao politika indray no manakana ny fampandrosoana ».

Ho an’ny mpanara-baovao politika, dia efa karazany vaky ampahibemaso izao ny ady eo amin’ny CST Roland Ratsiraka sy ny CST Naharimamy Lucien Irmah avy amin’ny antoko Tgv. Ity farany izay mpanao gazety tao amin’ny Canal 6 tamin’ny fotoan’androny.

Efa miambina ny andian-jatovo

Etsy ankilany, nitana ny teny navoakany ingahy Roland Ratsiraka, efa napetrany ao amin’ny lapa maitso ireo andian-tanora hanara-maso sao mbola hanohy ny asa fikitihana ny ahi-maitso ry zareo avy eo anivon’ny SMAPT. Hatreto aloha, nihantona tanteraka ny asa fanavaozana, tsy namerina ny fefy vôlo intsony ny orinasa nahazo ity Tetikasa ity.

Fantsy alohan’ny fifidianana

Mazava amin’ny rehetra koa fa efa karazany hazakazaka ho any amin’ny fifidianana ity fifamelezana fantsy eo amin’ny MTS sy ny Tgv ity. Mazava ary efa takatry ny rehetra fa samy ho kandidà i Roland Ratsiraka sy Andry Rajoelina, ka samy efa miezaka mambabo ny fom-bahoaka.

Hivory tsy ara-potoana ny filan-kevitra kaominaly

Manoloana io raharaha lapan’ny tanàna io, hiatrika fivoriana tsy ara-potoana ireo mpikambana ao anatin’ny filan-kevitry ny tanànan’i Toamasina rahampitso talata amin’ny 10 ora maraina. Tombanana sahady fa ny fanakanana ny fanohizana ny asa fanavaozana ny lapa maitso no fehin-kevitra hivoaka. Ny TIM sy ny MTS mantsy no maro an’isa ao anatin’ny filan-kevitra kaominaly ao Toamasina.

Andrasana arak’izany ny tohin’ity raharaha ity. Raharaha izay tena maha be resaka amin’ny toerana rehetra aleha ao Toamasina ary tsy ataon’ny mpanao politika sy ireo “mersenera” politika ambanin-javatra.

http://ti1ca.com/emgcrg39-Naharimamy-Lucien-Irmah.JPG.html

http://ti1ca.com/17twwyid-Roland-Ratsiraka.jpg.html

Nangonin’i NIM ( Toamasina)

nim.tama@gmail.com